دايره

أوقات كتير في حياتنا
بننسى فيها روحنا
وبنعمل حجات تجرحنا
وبنعملها ليه ؟

أوقات بتيجي علينا
و أوقات بتنادينا
بس اللي فينا فينا
وهنعمل ايه ؟

سعات الدنيا تجينا
ترسم بسمه في عنينا
وتكتب على ايامها.. حروف أسامينا
وبعديها ايه ؟

ترجع تفرقنا
وتصّعّب علينا حياتنا
وتبصلنا بنظرة ..
عملتلكم أيه ؟

بنستغرب عليها
بتقتلنا بإديها
وبكل براءه جايه
تمدلنا اديها
دا اسمه ايه ؟

فكرانا هانصدقها
ونعدي عاللي فاتنا
ونبكي عليه ؟

اوقات بتحضنا
واوقات بتهجرنا
هيا فكرانا ايه ؟

الغلطه مش عليها
احنا اللي سبنالها روحنا
تبيعها وتشتريها
وايه ناويه عليه ؟

هتضمنا بإديها ؟
ولا هترمينا؟
وتجيب غيرنا تاني .. تعمل فيه ببساطه
زي ما عملت فينا
هيا الحكايه ايه ؟

الدنيا دي لعبه
بس لعبة كبيره
يا تكسبها مرة
ياتخسر وتضحكلك .. وتسألها بغباء
بيضحكك ايه ؟؟

بتضحك عاللي فاكر
انه بزكاءه شاطر
وقادر يفهمها
وبيدخل امتحانها
يلاقي نفسه راسب
يبقى ماتضحكش ليه ؟.؟

بندور ع السعاده
يمكن نلاقيها بره
ولو فكرنا لحظه
نلاقيها بين ايدينا
بنبص بره ليه ؟؟

وتلاقينا بنسأل
يا دنيا عايزه ايه ؟
يا دنيا قوليلنا ..
هتنتهي على ايه ؟
في حد يسأل دايره انتي نهايتك ايه ؟؟